《讀者投稿》
最近我由香港跟隨丈夫移民到新加坡住，因為申請緊屋嘅關係所以都係喺佢屋企住住先，同埋有一間大嘅房。頭兩個月我因為申請一個visit pass的東西，大概需時兩個月，有呢個pass我就可以工作，所以我暫時每天都是在家。
咁啱62因為年紀老邁需要住院嘅關係，有時候我都會幫忙看一下佢兩個老人家，62行動不便，幸好99行動都算非常好，一向都係佢照顧開62。但99就常常唔記得東西，又唔記得食血壓藥。之前一係唔食搞到血壓去到200，而家就日日食勁多次，真係唔知點搞。
去之前兩個大哥大嫂已經叮囑我話99很麻煩，叫我有定心理準備。第一個月嘅時候都冇咩問題，到第二個月嚟啦！開始囉囉唆唆，又話因為我喺度用得多水電，問題係我哋覺得水電都係應該自己比，所以一路都冇叫佢俾錢。最恐怖嘅事佢唔俾我每次去廁所嘅時候沖厠，佢話去小便就只可以用2壳佢放在水桶嘅水，去兩三次先可以沖一次水。因為沖一次水會浪費很多水，要交多很多水費。
然後我而家每次去廁所佢就會又講一次。難道我每次去廁所要向佢報告我是大定小嗎？！今日我終於忍唔住話佢，我話去完廁所點可以唔沖廁，咁污糟！我哋香港人每次去都會沖厠。然後佢就話你香港還香港，我呢邊就係好慳的。我心諗好似得你一個先係咁。然後又借題發揮，話因為啲水電，我哋就冇人比伙食佢乜乜乜，根本係我哋個個有俾錢係佢，自己唔記得放左係邊。
我明白佢眼中，我日日唔返工喺度冇嘢做。呢樣我理解。但佢成日喺度講呢個講嗰個真係好反感。佢前後有四個新抱，佢都冇一個滿意。
前排去我62出咗院回家，但係因為佢皮膚有啲問題需要日日換紗布，99可能覺得好麻煩就開始講說話俾我聽，話照顧62應該係啲新抱來做，又話以前佢家婆叫佢哋做呢樣做個樣都係咁，而家個個新抱都掛住出外工作冇人肯理佢哋。問題係阿爸啲皮膚病係全身，有啲仲係敏感部位。難道要你老公除晒衫等我哋d新抱去整理嗎？嗰個係佢自己老公。我地話請工人或者啲護士上嚟，佢又講到好似全世界都係壞女人。所以我老公都頂佢唔順。好彩我哋決定等我開始工作之後搬出去租屋住。
＃我的極品四大長老
Search